Տեսանկյուն

Տավուշի Մարզի Անկախ Լրատվական

Դիլիջանի համայնքապետարանը նախկին քաղաքապետի որդուն եւ այլոց դատի է տվել

Դիլիջանի համայնքապետարանը նախկին քաղաքապետի որդուն եւ այլոց դատի է տվել

2017թ. հուլիսի 26-ին Դիլիջանի համայնքապետարանի իրավաբան Վաղինակ (Արայիկ) Մարկոսյանը Տավուշի մարզի ընդհանուր իրավասության առաջին ատյանի դատարան հայցադիմում է ներկայացրել ընդդեմ Գեւորգ Ժորայի Սահաբալյանի՝ հողամասի վարձակալության պայմանագիրը վաղաժամկետ լուծելու, պայմանագրի հիման վրա տրված վարձակալության իրավունքի գրանցումն անվավեր ճանաչելու, 454 հազար 454 դրամ վարձավճար ու հաշվարկված տույժ եւ 17 հազար 90 դրամ նախապես վճարված պետական տուրք բռնագանձելու պահանջներով:

Հոկտեմբերի 17-ին այդ գործով Դիլիջան քաղաքում նախնական դատական նիստ է կայացել: Վաղինակ (Արայիկ) Մարկոսյանը հայտնեց, որ ինքը, որպես Դիլիջանի համայնքապետարանի ներկայացուցիչ, մասնակցել է նիստին, Գեւորգ Սահաբալյանը չի ներկայացել, տեղեկություններ կան, որ նա Ռուսաստանում է գտնվում: Դատական նիստը հետաձգվել է, հաջորդ նիստը նշանակվել է 2018թ. հունվարի 26-ին: Գեւորգ Սահաբալյանը Դիլիջանի նախկին քաղաքապետ Ժորա Սահաբալյանի որդին է: Ժ. Սահաբալյանը 2002-2005թթ. Դիլիջանի քաղաքապետն էր, նա 2008թ. Դիլիջանի քաղաքապետի ընտրություններում թեկնածու է առաջադրվել, հետո՝ հանել թեկնածությունը,2012թ. ընտրություններում ԲՀԿ-ի կողմից քաղաքապետի թեկնածու է առաջադրվել, սակայն չի ընտրվել:

Նա, արդեն որպես անկուսակցական, 2016թ. փետրվարի 14-ին կայացած խոշորացված Դիլիջան համայնքի ղեկավարի ընտրություններում համայնքի ղեկավարի թեկնածու էր, սակայն պարտվեց 2005 թվականից Դիլիջանը ղեկավարող Արմեն Սանթրոսյանին:

Վաղինակ (Արայիկ) Մարկոսյանը հայտնեց, որ համայնքապետարանը գումարներ բռնագանձելու պահանջով դատի է տվել ոչ միայն նախկին քաղաքապետի որդուն, այլ նաեւ՝ համայնքին պարտքեր ունեցող բազմաթիվ անձանց: Նրա վկայությամբ՝ դատական ակտերի հարկադիր կատարման ծառայությունում են գտնվում Դիլիջանի համայնքապետարանի ներկայացրած 9 հայցով դատարանի վճիռների կատարողական թերթիկները: Այդ վճիռներից մեկով Դիլիջան քաղաքի բնակչից հօգուտ համայնքի պետք է բռնագանձվի 679 հազար դրամ գույքահարկի եւ հողի հարկի գումար: Մնացած 8 գործերը վերաբերում են դիլիջանցիների տրանսպորտային միջոցների գույքահարկի պարտքերին: Այդ 8 հայցով ԴԱՀԿ-ը պետք է բռնագանձի, ընդհանուր առմամբ, 2 միլիոն 255 հազար դրամ:

Ոսկան ՍԱՐԳՍՅԱՆ

Հրապարակվել է։ 22:40 14/11/2017

Մեկնաբանություններ (0)

Առայժմ մեկնաբանություններ չկան

© 2017 - Բոլոր իրավունքները պաշտպանված են: Tesankyun.am կայքի նյութերի օգտագործումն առանց հղման արգելվում է: Նյութի ամբողջական հրապարակումը արգելվում է։ Հրապարակման հեղինակի կարծիքը ոչ միշտ է համընկնում խմբագրության կարծիքի հետ: Գովազդների բովանդակության համար պատասխանատվությունը գովազդատուներինն է:
ՍՊԱՍԱՐԿՎՈՒՄ է ՝ CREATE'IT SOFTWARE ՍՊԸ-ի կողմից
Շահավետ տեխնոլոգիական լուծումներ